أمل القصار تكتب: علمتني أيامي

علمتني أيامي :انو شي كتير مهم نعمل لحالنا update و upgrade من وقت لوقت ونحاسب حالنا ونشوف اخطائنا وشو أسبابها ونحاول نحسن من حالنا قد ما منقدر.

علمتني أيامي: انو الانسان القنوع ويلي بيرضى بقسمة ربنا هو الانسان الغني ويلي عينو بصحن غيرو رح يضل فقير لو ملك مال الدنيا.

(ما بقصد انو ما يطور من حالو ويحاول يكون افضل علما ومالا)

علمتني أيامي: انو لازم نشوف شو عنا وشو الله عاطينا ونكون ممنونين دائما وما نركز فقط على يلي ناقصنا لانو التركيز عالنواقص بيولد جفا وحقد وكره عالاخرين بشكل تلقائي (لئن شكرتم لأزيدنكم)

علمتني أيامي: انو حط حالي مكان الأخرين وحاول يبرر لهم حتى تصرفاتهم السيئة قبل ما احكم عليهم بقسوة او اخد موقف سيئ تجاههم (انا كنت هيك)

علمتني أيامي: انو ما في اهم بالدنيا من صحتنا وولادنا، وكل الأشياء والضغوطات الأخرى بتمر وبتصير ماضي واذا ما عاجبتنا فينا ننساها ونتجاهلها مو صعب أبدا (من المحال دوام الحال).

علمتني أيامي :انو ثقافة الانتقام من أي شخص حتى لو اذانا او غلط بحقنا ما رح تجيب نتائج بترضينا ولازم ما نضيع وقتنا عليها (وحياتك حقك بيوصل لعندك بدون اي مجهود) المهم تكون متأكد انك على حق وما ظلمت ولا اذيت

علمتني أيامي: انو ما نخاف من بكرة طول ما نحنا عم نعمل يلي علينا ونترك الباقي لرب العالمين بشرط نكون مؤمنين انو شو ما اخترلنا ما بيظلمنا.

علمتني ايامي :انو الصداقة شيء مهم بالحياة والأصدقاء متل الفيتامينات، نحنا بحاجتهم بس اذا أسأنا استخدامهم او اكثرنا منهم اجسامنا بتتخلص منهم بشكل تلقائي، أو ممكن يسببوا التسمم ،واقل ما يمكن مارح يكونوا شيء مفيد لهيك علينا الحذر باستخدامهم .

علمتني ايامي: انو متل ما بتنظر لنفسك الناس بتنظرلك واحترامك للأخرين يدل على احترامك لنفسك لذلك عامل الاخرين متل ما بتحب يعاملوك.

علمتني أيامي: انو فصل الأشياء عن بعضا من اصعب التمارين يلي لازم الانسان يضل يدرب حالو عليها.

علمتني ايامي: انو اللا مبالاة بمسؤولياتنا وواجباتنا بتقلل من قيمتنا بين الناس (اعرف واجباتك قبل ان تطالب بحقوقك)

علمتني أيامي: انو ما نستخف بالاخرين حتى لو حسينا حالنا بمستوى افضل منهم لانو بنفس الوقت في كتير ناس بتحس حالها بمستوى اعلى مننا